İQNA-nın (Beynəlxalq Quran Xəbər Agentliyi) verdiyi xəbərə görə, İmam Hüseynin (ə) müqəddəs ziyarətgahının Darul-Quran idarəsi Həzrət Zeynəbin (ə) müqəddəs hərəminin idarə heyətinin həmkarlığı ilə Dəməşqdə Quran müəllimlərinin milli təkmilləşdirmə kurslarını təşkil edib.
İmam Hüseynin (ə) müqəddəs ziyarətgahının Darul-Quran idarəsinin müdiri Həsən Mənsuri bu barədə deyib: Bu kurslar Həzrət Zəhranın (s) münarək mövlud günləri astanasında başlayıb.
O əlavə edib: Bu iş Dəməşqin "Seyyidə Zeynəb" rayonunda İmam Hüseyn (ə) hərəminin Darul-Quran idarəsinin Suriya şöbəsini təsis etmək üçün başlanqıcdır.
Mənsuri bu kurslarda Suriyanın müxtəlif şəhərlərindən olan 40 Quran təlimçisinin iştirak etdiyini və onların 100 nəfər arasından seçildiyini önə çəkərək vurğulayıb: Quran müəllimlərinin təkmilləşdirmə kurslarının keçirilməsinin əsas hədəfi onların Quran elmlərini müxtəlif səviyyələrdə müxtəlif yaş qrupları üçün tədris səviyyəsini yüksəltməkdir.
Qeyd edək ki, İmam Hüseynin (ə) hərəminin Darul-Quran idarəsinin Suriyadakı fəaliyyətləri keçən ilin mübarək Ramazan ayından başlayıb.