Taron masu zanga-zangar adawa da daidaita alaka da Isra'ila a kasar Mauritania
Kamfanin dillancin labaran kur’ani na iqna ya habarta cewa, ya nakalto daga shafin sadarwa na yanar gizo na 21 na cewa, dimbin ‘yan kasar Mauritaniya sun yi Allah wadai da daidaita alaka da gwamnatin sahyoniyawan ta hanyar halartar wani taron zanga-zanga a gaban masallacin Saudiyya da ke Nouakchott babban birnin kasar a yammacin ranar Juma’a 31 ga watan Shahrivar.
Masu zanga-zangar dai na rike da tutoci masu dauke da taken "Quds amana ce, kuma sabawa cin amana ne" da kuma "Mauritaniya ta yi Allah wadai da daidaitawa". Ta hanyar rera taken yin Allah wadai da daidaita alaka da gwamnatin sahyoniyawan, wadannan masu zanga-zangar sun bukaci goyon bayan masallacin Al-Aqsa da kuma birnin Kudus da ke mamaye da su kan yadda 'yan mamaya suke ci gaba da tozarta wannan masallaci da kuma Kudus mai tsarki.
Wannan zanga-zangar wacce kungiyar ‘Student Initiative Against Normalization’ ta shirya, ta gudana ne domin mayar da martani ga labaran da ke nuni da kusantar daidaita alaka tsakanin Riyadh da gwamnatin sahyoniyawan da Amurka ke marawa baya.
Benjamin Netanyahu firaministan gwamnatin sahyoniyawan a jawabin da ya gabatar a zauren majalisar dinkin duniya a jiya Juma'a, yayin da yake ishara da kusantowar zaman lafiya, ya ce ya yi imanin cewa, Isra'ila na gab da cimma yarjejeniyar zaman lafiya mai cike da tarihi da kasar Saudiyya. Bai kamata a baiwa Falasdinawa 'yancin yin watsi da yarjejeniyar zaman lafiya ba.
Kwana daya gabanin jawabin Netanyahu, Yarima mai jiran gado na Saudiyya ya fada a wata hira da tashar Fox News ta Amurka cewa kasarsa ta kusa daidaita alaka da gwamnatin mamaya.
Mohammed bin Salman ya kara da cewa: Goyan bayan gwamnatin Biden na nan don kaiwa ga wannan matsayi, kuma batun Falasdinu yana da matukar muhimmanci a gare mu. Dole ne mu warware wannan bangare kuma ya zuwa yanzu muna ci gaba da tattaunawa a wannan fanni.
